Gara-gara aye ke Holland ke dua kalinye, aye menang tiket gratis karna daptar di e-mail newsnya KLM. Jadi aje pas diundi, aye menang dah dua tiket gratis. Karna laki aye kagak demen ame nyang namanya jalan-jalan tipe liat-liat kota bangsa laen (ga tau kenape ye? kalo aye sih emang hobi jalan-jalan), jadi aje aye ajak Emi, tetangga dan temen aye.

Kalo ga salah kite ke sana sekitar bulan maret gitu, ini pas taun 2003. Kebetulan aje mpok Emi nyang kerjanye sebage wartawati di Opel, die punya banyak relasi, mangkanye ade aje temennye nyang jemput kite di airport Schiphol, si Frank- Frankenstein (Frank Niewenhuisse). Abang bule, cakepnye….. belande aseli! Aye inget, kite brangkat subuh-subuh, dari rumah sekitar jam setengah lime pagi, tau-tau di airport, di kantornye KLM banyak nyang ngantri percaye ga sih?

Oiye, ceritanye gini, kite tu mo brangkat jumat sore, eh taunya pas aye nempo kantornye KLM untuk ambil tiket cetaknye, mereka bilang biasanye kalo jumat sore tuh pesawat penuh amat, jadi mungkin aje kite ngga kebagian tempat (berhubung tiket gratis, jadi tergantung tempat duduk lebihan, nasib…)

Untung aje sabtu pagi itu kite brhasil dapet tempat duduk untuk dua orang dengan susa paye, teriak sana sini (mpok Emi di kantor penjualan dan aye di kantor check in), berangkatlah kite menuju Amsterdam.

Sebelumnye aye ude mesen satu kamar hotel, ternyate aye dapet satu hotel nyang cukup bagus, ntu Hotel namenye Bethoveen, deket Beatriz Park. Aye pikir letak hotel cukup jauh dari pusat kota, ternyata kagak, cuma 10 menit. Harga kamar juga kagak mahal karna pas ada penawaran mure.

Kite di anter bang Prank ke hotel, abis itu die langsung balik ke tempat kerjanye, kite janjian untuk makan malam. Pilihan aye restoran Indonesia nyang ternyate muahal buju buneng…soalnye pake lip musik segale….tapi kagak ape-ape….pan sekali-kali bolehlah kite-kite bayar lebih.

Jadi hari pertama kite di sono, pagi-pagi pas naik trem ude salah arah…mane sistem tiketnye lain dengan di Madrid, aneh gitu…walhasil atas bantuan seorang anak mude yang nyerosot pake itu noh…ape namenye? sketbord, kite dikasi tau kalo kite salah arah….Die heran aje kok ada turis naik kereta menuju kampung. Mungkin kalo di Jakarte, kereta nyang mo pergi ke bekasi kali ye?

Tempat pertame nyang kite samperin, Musiumnya Pan Gogh. Terus terang aye jatuh cinte ame lukisan-lukisannye, beliau pelukis nyang paling aye suka. Kalo bisa aye pengen sekali lagi nyamperin musium itu lagi ato nempo pameran lukisan2nye. Tentunya aye juga beli postal-postal dan atu poster lukisannye, bakal kenang-kenanganlah. Buat dipajang di ruang tamu rumah aye….pan biar keliatan aye ude ke belande kha kha kha…

Abis itu, kite jalan-jalan di sekitar kota dan nongkrong dulu sembari makan di rume makan thailand, hmmm nikmatnye! abis itu….aye ndiri lupa kite ude ke mane aje, ngalor ngidul ga karuan, poto sana sini. Sampe malemnye janjian ame bang Prank, makan malam kemudian kite jalan-jalan ke Red District Area (tempat di mane ade prostitusi nyang diizinin gubernur, perempuan-perempuan nyang penjaja seks itu biasanye pade bediri ato duduk di etalase-etalase di sepanjang jalan). Abis puas ngeliat Red District, sekedar ngejabanin rasa ingin teu, kite pergi ke bar, nyobain bir-birnye belande dan ngobrol-ngobrol sambil ditemani musik jazz.

Abis itu kite jalan lagi menuju diskotik, cuma aye kagak demen aje…..

Jadi aje kite jalan menuju hotel (jaraknya lumayan jauh). Tapinye pas ditengah jalan tiba-tiba ujan deres! untung aje aye bawa payung lipet. ….

Hari ke dua, kite pergi lagi ame Prank, wah diajak ke mane-mane, Delp, Leiden, trus ke pante (lupa aye nama tempatnye).

Itu pante, dasar pantenya orang Belande….yah….adenye kabut doang, dingin, mendung…dan du ile….ngapain juge orang-orang jalan-jalan di sono…kasian ye orang Belande…..mangkanye jadi orang indonesia tuh bersyukur, negara kite didatengin matahari tiap ari….jadi kita ireng-ireng, kagak kayak bule-bule londo…..

Kite juga sempat masuk satu restaurant hotel super mewah….Prank nyang bayar minumnye. Jadi begitulah, orang londo kagak bise nikmati sabtu minggu di bawah terik mata ari, jadi hiburannye ya itu die….masuk bar keluar bar, jalan-jalan di pante nyang gelap…

Nyang paling berkesan sih di Holland, ya melihat karya-karya Van Gogh dan kota Leiden. Aye pernah juga ke Leiden sebelumnye karna ade sodara jauh di sono, Wa Ting-ting. Kite di ajak berlayar, di belakang rumahnye ade sungai. Sampe di danau teh…kite bisa liat itu rumah2 belande…..bagusnye….yah rumah orang-orang kayanya lah, jurgan menir, lengkap dengan yate masing-masing. Waktu itu sih cuaca cerah, jadi bagus banget de, ngga pernah tuh gue lupe, seperti di surge…

Di negri meneer semuanye tertib, kagak ade keliatan selokan dan sampe. Kadang aye ame oom aye ngobrol-ngobrol, kalo aje belande masi berkuase di negri kite, bakal dibenerin de tuh urusan got, selokan dan kali Ciliwung, jaman belande masi dipake mandi noni-noni belande. Sekarang mah boro-boro….nyang ade isinya ape aje tuh, kagak kebayang joroknye. Aye heran, kenape kite kagak bise meliara kota kita sendiri? asal jangan buang sampe sembarangan dan itu urusan got, coba deh belajar ame bule-bule, soal kanal-kanal pembuangan. Batavia kalo wargenye tertib bisa sebagus Amsterdam. Kapan kite bisa bilang ke mreka, “Kite juga bisa meneer!!!!

PS. Yang jelas karne di Belande aye liat WC yang ngebersihin sendiri, dan tutupnya terangkat ato tertutup ndiri karene pake sistim sensor, besokannya aye mimpi punya mangkok salad nyang punya pengukur dan penstabil temperatur….canggih kan?